नेपालमूलकी युवती मेनुका गौतम (कियारा) पविचाया कैथालोएङचाइलाई मिस युनिभर्स सङ्खला (Miss Universe Songkhla) को उपाधि जितेको अवसरमा Thai-Nepali Association Youth Department ले विशेष सम्मान गरेको छ।

बैंककमा आयोजित कार्यक्रममा कियारालाई सम्मानपत्र, मायाको चिनो तथा शुभकामना प्रदान गर्दै आयोजकले उनको सफलतालाई व्यक्तिगत उपलब्धिमात्र नभई थाइल्यान्डमा रहेका नेपालमूलका नेपाली तथा थाई–नेपाली समुदायको साझा गौरवका रूपमा व्याख्या गरेको छ।

कार्यक्रममा बोल्दै युवा विभागका पदाधिकारीहरूले कियारा अब सङ्खला प्रान्तको प्रतिनिधित्व गर्दै मिस युनिभर्स थाइल्यान्ड प्रतियोगितामा प्रतिस्पर्धा गर्न लागेकाले यो नेपाली समुदायका लागि ऐतिहासिक उपलब्धि भएको बताए। उनीहरूले कियाराको आत्मविश्वास, नेतृत्व क्षमता, मेहनत र व्यक्तित्वले थाइल्यान्डमा रहेका नेपालमूलका युवायुवतीलाई नयाँ प्रेरणा दिएको उल्लेख गरे।

उनीहरूले विदेशमा हुर्किए पनि कियाराले नेपाली भाषा, संस्कृति र पहिचानलाई जोगाउँदै अन्तर्राष्ट्रिय मञ्चमा नेपालमूलका नेपालीको पहिचान स्थापित गर्न महत्वपूर्ण भूमिका खेलेको बताए। नेपाली भाषा बोल्न, पढ्न र लेख्न सक्ने उनको क्षमताले नयाँ पुस्तामा आफ्नो मौलिक पहिचानप्रति सकारात्मक सन्देश दिएको उनीहरूको भनाइ थियो।

संस्थाका अनुसार कियारा मिस युनिभर्स थाइल्यान्ड प्रतियोगितामा नेपालमूलकी प्रतिनिधिका रूपमा सहभागी हुने पहिलो युवती हुन्। उनको उपलब्धिले भविष्यमा अन्य नेपालमूलका युवायुवतीलाई पनि अन्तर्राष्ट्रिय सौन्दर्य प्रतियोगितामा सहभागी हुन र आफ्नो प्रतिभा प्रदर्शन गर्न प्रेरणा मिल्ने विश्वास व्यक्त गरिएको छ।

यसैबीच, पीएनओका अध्यक्ष कुमार कार्की तथा एनआरएन अभियन्ता सञ्जय ढकालले कियारालाई मिस युनिभर्स सङ्खलाको उपाधि जितेकोमा बधाई दिँदै आगामी मिस युनिभर्स थाइल्यान्ड प्रतियोगिताका लागि शुभकामना व्यक्त गरेका छन्।

उनीहरूले कियाराको सफलताले विश्वभर रहेका नेपालमूलका नेपाली समुदायको प्रतिष्ठा र पहिचानलाई थप उचाइमा पुर्‍याएको उल्लेख गर्दै राष्ट्रिय उपाधिसम्म पुग्ने विश्वास व्यक्त गरेका छन्। साथै, उनको उपलब्धिले विदेशमा रहेका नेपाली युवायुवतीलाई आफ्नो प्रतिभा, भाषा, संस्कृति र पहिचानलाई अन्तर्राष्ट्रिय मञ्चमा स्थापित गर्न थप प्रेरणा दिने विश्वास व्यक्त गरेका छन्।

Thai-Nepali Association Youth Department ले पनि कियाराको आगामी यात्रामा निरन्तर साथ, सहयोग र समर्थन रहने प्रतिबद्धता जनाएको छ। संस्थाले कियाराले मिस युनिभर्स थाइल्यान्ड हुँदै अन्तर्राष्ट्रिय मिस युनिभर्स मञ्चसम्म पुगेर नेपालमूलका नेपाली समुदायको गौरवलाई अझ उचाइमा पुर्‍याउने विश्वास व्यक्त गरेको छ।