काठमाडौं, २१ साउन । नेपाल सरकारले नेपाल नर्सिङ काउन्सिलको अध्यक्षमा सकुन्तला प्रजापति, उपाध्यक्षमा बिमला कुमारी साह र रजिस्ट्रारमा पार्वती विष्टलाई नियुक्त गरेको छ।

नवनियुक्त अध्यक्ष, उपाध्यक्ष र रजिस्ट्रारले बिहीबार स्वास्थ्य तथा खाद्य स्वच्छता मन्त्री निशा मेहतासमक्ष पद तथा गोपनीयताको शपथ ग्रहण गरेका छन्। शपथ ग्रहणसँगै उनीहरूले नेपाल नर्सिङ काउन्सिलको जिम्मेवारी औपचारिक रूपमा सम्हालेका छन्।

स्वास्थ्य तथा खाद्य स्वच्छता मन्त्रालयका अनुसार काउन्सिलको नेतृत्व नियुक्तिसँगै नर्सिङ शिक्षा, पेशागत नियमन, सेवा प्रवाह र संस्थागत सुशासनलाई थप प्रभावकारी बनाउने अपेक्षा गरिएको छ।

शपथ ग्रहण कार्यक्रममा मन्त्री मेहताले नवनियुक्त पदाधिकारीहरूलाई नर्सिङ पेशाको मर्यादा, गुणस्तरीय स्वास्थ्य सेवा र जनविश्वास अभिवृद्धिका लागि जिम्मेवारीपूर्ण ढंगले काम गर्न निर्देशन दिएकी थिइन्।