काठमाडौं । महालक्ष्मी विकास बैंकले महिला कर्मचारीका लागि नर्सिङ केयर रुम तथा डे केयर सुविधा सञ्चालनमा ल्याएको छ ।

विश्व स्तनपान सप्ताह २०२६ (अगस्ट १–७) को अवसर पारेर बैंकले आफ्नो केन्द्रीय कार्यालय दरबारमार्गमा उक्त सुविधा सञ्चालनमा ल्याएको हो ।

मातृत्वलाई सम्मान गर्दै महिला कर्मचारीलाई सहज र परिवारमैत्री कार्य वातावरण उपलब्ध गराउने उद्देश्यले सुविधा सञ्चालनमा ल्याइएको बैंकले जनाएको छ । विशेषगरी स्तनपान गराइरहेका आमाहरूले सुरक्षित, स्वच्छ, सहज तथा गोपनीय वातावरणमा शिशुको हेरचाह र स्तनपान गराउन सक्ने व्यवस्था गरिएको बैंकको भनाइ छ ।

सुविधाको औपचारिक उद्घाटन बैंकको महालक्ष्मी महिला नेतृत्व तथा विकास मञ्चकी अध्यक्षले विशेष कार्यक्रमबीच गरेकी हुन् ।

बैंकको ३२औँ वार्षिकोत्सवको अवसरमा स्थापना गरिएको महालक्ष्मी महिला नेतृत्व तथा विकास मञ्चले महिला नेतृत्व क्षमताको विकास, संस्थागत विकासमा महिलाको प्रभावकारी सहभागिता अभिवृद्धि, व्यावसायिक दक्षता तथा आत्मविश्वास वृद्धि र समान अवसर तथा समावेशी कार्यसंस्कृतिको प्रवर्द्धनलाई प्राथमिकतामा राख्दै आएको बैंकले जनाएको छ ।

मञ्चमार्फत महिला सशक्तीकरणसँग सम्बन्धित विभिन्न कार्यक्रमसमेत सञ्चालन गर्ने उद्देश्य रहेको बैंकले जनाएको छ ।

महालक्ष्मी विकास बैंकले समावेशिता र लैंगिक समानतालाई प्राथमिकतामा राख्दै आएको बताउँदै नर्सिङ केयर रुम तथा डे केयर सुविधाको स्थापनाले कर्मचारीको कार्य–जीवन सन्तुलन, स्वास्थ्य तथा कल्याण र परिवारमैत्री कार्यसंस्कृतिलाई थप मजबुत बनाउने जनाएको छ ।

बैंकले यस अवसरमा सबै कार्यस्थललाई थप आमामैत्री वातावरण निर्माणतर्फ अग्रसर हुन आग्रह गर्दै कर्मचारीको स्वास्थ्य, सम्मान र समग्र कल्याणप्रतिको आफ्नो प्रतिबद्धता दोहोर्‍याएको छ ।

महालक्ष्मी विकास बैंकले नेपाली नागरिकलाई गुणस्तरीय वित्तीय सेवा प्रदान गर्दै आएको छ । बैंकले हालै काठमाडौं महानगरपालिका–३०, ज्ञानेश्वरमा कफी लाउञ्जसहितको डिजिटल हबसमेत सञ्चालनमा ल्याएको छ ।