काठमाडौं । हरितालिका तीज नजिकिएसँगै नयाँ तीज गीत सार्वजनिक हुने क्रम बढेको छ । यसै क्रममा चर्चित गायिका निशा सुनारको नयाँ तीज गीत ‘झ्याप छौ की साइलो दाइ’ सार्वजनिक भएको छ ।

सार्वजनिक भएको दुई दिनमै लाखौं दर्शकको ध्यान तान्न सफल गीतमा प्रेमिल भावलाई रमाइलो शैलीमा प्रस्तुत गरिएको छ । तीजको माहोललाई लक्षित गरिएको गीतको भिडियो पनि कलात्मक ढंगले तयार पारिएको छ ।

गीतमा निशा सुनार र गायक तथा संगीतकार खेम सेञ्चुरीको स्वर रहेको छ । वरिष्ठ गीतकार रमेश बिजीको शब्द रहेको गीतमा खेम सेञ्चुरीकै संगीत तथा थेगो छ ।

गीतको भिडियो सुनिल बिकले निर्देशन गरेका छन् । रोशन विश्वकर्माको कोरियोग्राफी रहेको भिडियोमा अनिल के. मानन्धरको छायांकन, प्रविन भट्टको सम्पादन तथा राजेन्द्र मोक्तानको रंग संयोजन रहेको छ ।

भिडियोमा अभिनेता नाजिर हुसेन र मोडल उषा उप्रेती मुख्य भूमिकामा देखिएका छन् । प्रेम र तीजको रमाइलो वातावरणलाई केन्द्रमा राखिएको भिडियोले गीतको भावलाई थप आकर्षक बनाएको छ ।

सार्वजनिक भएको छोटो समयमै गीतले पाएको दर्शकको प्रतिक्रियाले ‘झ्याप छौ की साइलो दाइ’ यस वर्षको तीजमा रुचाइएको गीत बन्ने संकेत गरेको छ ।